Avro-Atlantik Azərbaycanlıları Tərəfdaşlıq Şurasının baş katibi Sahil Qasımov Bakıda keçirilən AVRO-ATLANTİK AZƏRBAYCANLILAR TƏRƏFDAŞLIQ ŞURASININ (EAPCA) geniş tərkibli rəsmi tədbirində çıxışı zamanı Azərbaycanın informasiya mübarizəsində əldə etdiyi nailiyyətlər və qarşıda duran vəzifələr haqqında danışıb. Brtm.az xəbər verir ki, Sahil Qasımov qeyd edib ki, uzun illər ərzində Qarabağ münaqişəsi bəzi dairələr tərəfindən yanlış şəkildə dini müstəviyə çəkilməyə çalışılsa da, Azərbaycan tərəfinin ardıcıl və faktlara söykənən fəaliyyəti bu cəhdlərin qarşısını alıb: “Qarabağ məsələsi nə dini, nə də siyasi manipulyasiyalarla izah edilə bilərdi. Biz bu təhriflərin qarşısını aldıq və həqiqəti qəbul etdirə bildik. Müharibədən sonrakı dövr yeni mərhələnin başlanğıcıdır və bu mərhələdə daha çox iş görülməlidir. Bundan sonra əlimizi yanımıza qoymamalıyıq. Daha çox işləməli, daha çox fəaliyyət göstərməliyik. Qarşıda böyük məsələlər var. Yaxın perspektivdə diqqət Qərbi Azərbaycan məsələsinə və Türk Dövlətləri Təşkilatı xəttində əməkdaşlığın gücləndirilməsinə yönələcək. Qarşıda Qərbi Azərbaycan məsələsinin beynəlxalq müstəvidə gündəmdə saxlanılması və Türk Dövlətləri Təşkilatı çərçivəsində əlaqələrin davam etdirilməsi istiqamətində mühüm işlər görməliyik. Üzərimizə düşən missiyanı yaxşı dərk edirik və bu istiqamətdə fəaliyyətimizi genişləndirəcəyik.” Sahil Qasımov çıxışının sonunda təşkilat üzvlərinə və tədbir iştirakçılarına göstərilən dəstəyə görə təşəkkürünü bildirib.
Deputat: “Prezidentimizin siyasəti Azərbaycanın suverenliyini və milli ləyaqətini bərpa etdi, beynəlxalq nüfuzunu daha da artırdi”
Bakıda keçirilən AVRO-ATLANTİK AZƏRBAYCANLILAR TƏRƏFDAŞLIQ ŞURASININ (EAPCA) geniş tərkibli rəsmi tədbirində çıxış edən Milli Məclisin deputatı Rizvan Nəbiyev Prezident İlham Əliyevin dövlətçilik xəttinin Azərbaycanın ərazi bütövlüyünün, suverenliyinin və milli ləyaqətinin bərpasında həlledici rol oynadığını bildirib. Brtm.az xəbər verir ki, deputat qeyd edib ki, ləyaqətimizin bərpası yalnız 10 milyonluq Azərbaycan əhalisi deyil, daha geniş coğrafiyada yaşayan bütün soydaşlarımıza da aiddir: “Avropada təhsil aldığım illərdə Azərbaycan diaspor təşkilatları müəyyən çətinliklərlə fəaliyyət göstərsə də, bu gün vəziyyət dəyişib, Azərbaycan diasporu güclü şəkildə təşkilatlanır, dövlətçilik maraqlarımız uğrunda fəaliyyət göstərdiyi ölkələrin siyasi dairələri ilə effektiv əlaqələr qurur.” Deputat vurğulayıb ki, bu inkişafın əsas səbəbi Prezident İlham Əliyevin ardıcıl və məqsədyönlü siyasətidir: “Bu istiqamətdə həyata keçirilən tədbirlər ölkəmizin dünya miqyasında mövqeyinin daha da möhkəmləndirilməsinə töhfə verir”. Sonda Rizvan Nəbiyev Avro-Atlantik Azərbaycanlılar Tərəfdaşlıq Şurasının fəaliyyəti ilə bağlı təbriklərini çatdırıb: “Sahil müəllim və təşkilat üzvləri Vətənə xoş gəlmisiniz, fəaliyyətinizdə davamlı uğurlar arzulayıram. Bu yol ölkəmizin uğur yoludur.”
Zamiq Yunisov: “EAPCA ölkəmizin qlobal əməkdaşlıq imkanlarını genişləndirir”
Avro-Atlantik Azərbaycanlılar Tərəfdaşlıq Şurasının (EAPCA) Bakıda keçirilən təqdimat tədbiri ölkəmizin beynəlxalq əməkdaşlıq istiqamətində atdığı mühüm addımlardan biri kimi qiymətləndirilir. Brtm.az xəbər verir ki, EAPCA-nın Protokol Rəhbəri Zamiq Yunisov təşkilatın missiyası və əhəmiyyəti barədə fikirlərini bölüşüb. Zamiq Yunisov bildirib ki, EAPCA-nın təqdimatı Azərbaycanın həm siyasi, həm ictimai müstəvidə qlobal fəallığını nümayiş etdirir: “Avro-Atlantik Azərbaycanlılar Tərəfdaşlıq Şurasının (EAPCA) təqdimatı ölkəmiz üçün əhəmiyyətli bir addımdır. Bu tədbir Azərbaycanın beynəlxalq əməkdaşlıqda fəal mövqeyini, diaspora fəaliyyətinin güclənməsini və yeni tərəfdaşlıq imkanlarının formalaşmasını nümayiş etdirir. Belə bir təşəbbüsün Bakıda keçirilməsi həm siyasi, həm də ictimai müstəvidə önəmli hadisədir. Təqdimat münasibətilə təşkil olunan rəsmi resepsiya əməkdaşlığın genişlənməsinə, yeni layihələrin qurulmasına və əlaqələrin möhkəmlənməsinə mühüm töhfə verəcək.”
Sahil Qasımov: “EAPCA Avro-Atlantik məkanında Azərbaycanın səsini gücləndirir”
Bakıda keçirilən AVRO-ATLANTİK AZƏRBAYCANLILAR TƏRƏFDAŞLIQ ŞURASININ (EAPCA) geniş tərkibli rəsmi tədbirində açılış nitqi ilə çıxış edən Avro-Atlantik Azərbaycanlıları Tərəfdaşlıq Şurasının baş katibi Sahil Qasımov təşkilatın yaranma tarixi və fəaliyyəti barədə məlumat verib. Brtm.az xəbər verir ki, Sahil Qasımov bildirib ki, EAPCA təxminən bir il yarım əvvəl Azərbaycanın Avropa İttifaqı yanındakı səfirliyində təsis olunub. Onun sözlərinə görə, təşkilatın yaradılmasında ondan artıq Avropa ölkəsində fəaliyyət göstərən azərbaycanlı qurumlar iştirak edib və Avropa Azərbaycanlıları Konqresi bazası genişləndirilərək yeni platforma formalaşdırılıb. O, qeyd edib ki, EAPCA bu qısa müddətdə Avro-Atlantik məkanında təsirli tərəfdaşlıq şurası qismində fəaliyyət göstərməyə başlayıb. Baş katib vurğulayıb ki, təşkilat artıq Niderland hökumət orqanları tərəfindən rəsmi şəkildə qeydiyyata alınıb və bir sıra vacib görüşlər keçirilib: “İlk rəsmi görüşlərimiz Avropanın ən mühüm ölkələrindən biri olan Türkiyədə — həm Millət Məclisində, həm Prezident Administrasiyasında yüksək səviyyədə baş tutub. Təşkilatımızın nümayəndə heyətləri digər qurumlarla da işgüzar görüşlər həyata keçirib.” Sahil Qasımov əlavə edib ki, hazırda EAPCA-nın nümayəndələri müxtəlif Avropa ölkələrindən Bakıya gəlib, lakin bəzi ölkələrdə gərgin vəziyyət səbəbindən bütün üzvlərin tədbirə qatılması mümkün olmayıb. Tədbirin məqsədi Azərbaycan ictimaiyyətinə təşkilatın fəaliyyətini təqdim etməkdir. “EAPCA siyasi müstəvidə fəal fəaliyyət göstərir və Avropa ölkələrindəki Azərbaycan diaspor təşkilatları, Dövlət Komitəsi, Milli Məclis, nazirliklər və media qurumları ilə sıx əməkdaşlıq edir. O bildirib ki, Avropada keçirilən tədbirlərdə Azərbaycan mətbuatının fəal iştirakı yüksək qiymətləndirilir və gələcək layihələrdə də bu əməkdaşlığın davam etdirilməsi nəzərdə tutulur”.
Elman Nəsirov: “Azərbaycan Tərəfdaşlıq Şurasının fəaliyyəti ölkəmizin haqq işinin dünyada müdafiəsinə mühüm töhfə verəcək”
Bakıda keçirilən Azərbaycan Tərəfdaşlıq Şurasının təqdimat tədbirində çıxış edən Milli Məclisin deputatı Elman Nəsirov diaspor qurumlarının son illərdə ölkəmizin milli maraqlarının müdafiəsində xüsusi rol oynadığını vurğulayıb. Deputat xatırladıb ki, Prezident İlham Əliyev son diaspor qurultayında xaricdə yaşayan azərbaycanlıların yaşadıqları ölkələrdə siyasi fəallığının artırılmasının vacibliyini xüsusi qeyd edib: “Cənab Prezident bildirib ki, Azərbaycan əleyhinə qəbul olunan hər hansı qərar və ya qətnamə qarşısında ilk növbədə bizim diaspor nümayəndələri öz etiraz səslərini qaldırmalıdırlar. Avropa və digər regionlarda fəaliyyət göstərən Azərbaycan Tərəfdaşlıq Şurasının üzvləri dəfələrlə bu məsələdə fəallıq nümayiş etdirib, ölkəmiz əleyhinə məlumat manipulyasiyalarına qarşı prinsipial mövqe ortaya qoyublar. Bizim dostlarımız, tərəfdaşlarımız müxtəlif ölkələrdə Azərbaycan həqiqətlərinin təhrif olunmasına imkan vermir, faktlarla cavab verirlər. Bu, həm siyasi savad, həm təşkilatlanma, həm də səmimi vətəndaş mövqeyinin göstəricisidir.” Deputat təşkilatın potensialına yüksək qiymət verərək bildirib ki, Azərbaycan Tərəfdaşlıq Şurası gələcəkdə beynəlxalq arenada ölkəmizin mövqelərinin gücləndirilməsində daha böyük rol oynayacaq: “Bu gün təqdimatı keçirilən Şura hələ öz sözünü çox deyəcək. Sizin həm bilik və təcrübəniz, həm də ölkəyə olan sevginiz var. Bu amillər fəaliyyətinizi daha təsirli edir.” Sonda Elman Nəsirov təşkilat üzvlərinə yeni uğurlar arzulayıb və Azərbaycanın haqq işinin dünyada layiqincə müdafiə olunması istiqamətində bundan sonra da fəal olacaqlarına inamını ifadə edib.
