Bakı QHT Resurs və Təlim Mərkəzi

“Vətən Naminə” Şəhid Ailələrinə Dəstək İctimai Birliyinin sədri Tünzalə Abduləlimova, Qazax rayonuna səfəri zamanı şəhid ailələrinə göstərilən diqqət və qayğıdan dərin təsirləndiyini bildirib. O, bu səfər çərçivəsində Qazax rayonunda antiterror əməliyyatı zamanı şəhid olmuş Yunis Kazımov və Azər Məmmədovun məzarlarını ziyarət edib, 44 günlük Vətən müharibəsi şəhidi Xalid Veyislinin mövlud mərasimində iştirak edib. QHT.az xəbər verir ki, T. Abduləlimova şəhid ailələri ilə görüşündə rayon rəhbərliyinin bu ailələrə göstərdiyi dəstəyi xüsusi olaraq qeyd edib. “Qazax rayon icra başçısı Rəcəb Abas oğlu Babaşovun şəhid ailələrinə göstərdiyi yüksək qayğı və diqqət hər kəsin təqdirinə layiqdir. Hər bir şəhid ailəsi Rəcəb müəllimin diqqətini və dəstəyini hiss edir.Şəhidlərimizi ziyarət edən zaman gözəl insanlarla taniş olduq. Şəhid ataları Elxan ata,Vaqif ata və Əfqanistan, Qarabağ veteranımız Azər qardaşlarımla təsadüfi tanışlıq bəlkədə təsadüfi deyildi.Bu insanlar Qazax rayonunu,insanlarını xüsusi olaraq İcra başşısını bizə elə gözəl tanıtdırdılar ki, buna görə xüsusi minnətdarlığımı bu cür paylaşaraq bildirmək istədim.,” deyə o vurğulayıb. Səfər zamanı təsadüfən şəhid ataları və veteranlarla tanış olan Tünzalə Abduləlimova, onların Rəcəb müəllimin gördüyü abadlıq işləri və şəhid ailələrinə göstərilən qayğı barədə söylədiklərinin təsadüfi olmadığını bildirib. “Bu səfər zamanı Qazax rayonunda gördüklərim mənə bir daha sübut etdi ki, şəhidlərimizin ailələrinə hörmət və diqqət daim ön plandadır. Hər bir icra başçısının Rəcəb müəllimdən örnək alması vacibdir,” deyə Abduləlimova əlavə edib. O, həmçinin icra başçısının köməkçisi Samir müəllimin ziyarətləri zamanı göstərdiyi diqqəti və qonaqpərvərliyi yüksək qiymətləndirib. “Bu sadəcə bir insanlıq göstəricisi deyil, eyni zamanda dövlətimizin şəhid ailələrinə olan münasibətinin bariz nümunəsidir. Bəzi İcra başçıları elə bilirlər ki,o kresloda əbədidirlər. Hərdən o kreslodan qalxın dönün o kresloya yaxşı baxın,baxın ki,siz özünüzdən sonra kreslo qoyub getmək üçün orda əyləşmisiniz yoxsa gözəl ad abad olunmuş gözəl şəhər.Sizdə o gəlib gedənlərdənsiz. Unutmayın bu gün bütün dünyada sözümüzü deyən,birlik rəmzimiz olan dəmir yumruğunu göstərən mənim Prezidentim İlham Əliyev Cənabları, sizi o kresloya oturdan sabah sizi elə özüdə yumruğunu başınıza vuracaq. AYILIN İÇRA BAŞCILARI. Mən bir daha Qazax Rayonu İçra Başcısı Rəcəb Abas oğlu Babaşova “Vətən Naminə” Şəhid Ailələrinə Dəstək İB ailəsi adından və Şəhid anası kimi xüsusi təşəkkür edirəm. Mənim Şəhidlərimizə və Ailələrinə belə xidmətləri var. Var olasınız, sizin gördüyünüz işlər Qazax rayonunda hər vaxt var olacaqdır. Allah başınızı uca eləsin. Və ən əsası bütün icra rəhbərlərinə sizdən örnək almalarını tövsiyə edirəm” deyə Tünzalə Abduləlimova vurğulayıb. Sonda Tünzalə Abduləlimova, “Vətən Naminə” Şəhid Ailələrinə Dəstək İctimai Birliyi adından Qazax rayon icra başçısı Rəcəb Abas oğlu Babaşova təşəkkür edib və bu nümunəvi xidmətlərin digər icra başçıları üçün də örnək olmasını arzulayıb.

“Azərbaycan 2030: sosial-iqtisadi inkişafa dair Milli Prioritetlər”dən biri də ekoloji problemlərin həll edilməsi məsələsidir. Bu istiqamətdə təbiətimizin tullantılardan azad olunması xüsusi önəm kəsb edir. QHT.az xəbər verir ki, bunu Qeyri-Hökumət Təşkilatlarına Dövlət Dəstəyi Agentliyinin İcraçı direktoru Aygün Əliyeva Tullantılar haqqında Qanunun icra vəziyyətinə dair ictimai müzakirələr zamanı deyib. İcraçı direktor bildirib ki, uzun illər Qarabağda, Şərqi Zəngəzurda Ermənistanın işğalı nəticəsində törədilən ekosid narahatlıq doğurur. Son zamanlar vətəndaşlar tərəfindən həmin bölgələrdə təbiətin çirkləndirilməsi, tullantıların yerə atılması ilə bağlı sosial şəbəkələrdə məlumatlar yayılır. İctimai qınağın vacibliyinə diqqət çəkən A.Əliyeva bu işdə QHT-nin fəal olmasının önəminə toxunub. İcraçı direktor tullantıların idarə edilməsi ilə bağlı videoçarxların televiziya kanallarında nümayiş etdirilməsi məsələsində Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi göstərməyə hazır olduğunu qeyd edərək vurğulayıb ki, bu videoçarxların səviyyəsi standartlara cavab verməlidir.

Hüquq müdafiəçisi Novella Cəfəroğlu Müsavat Partiyasından istefa verib. QHT.az xəbər verir ki, bu barədə Pravda.az-a hüquq müdafiəçisi özü məlumat verib. “Müsavat Partiyasına istefa məktubumu göndərdim. Partiya sədri İsa Qəmbər məktubu alıb. Mənə görə Müsavata söz gəlir, bu səbəbdən istefa verdim. Əlbəttə ki, istefamı qəbul edəcəklər. Baxmayaraq ki, 30 ildir, bir yerdə çiyin-çiyinə vuruşmuşuq, çoxlu dostlarım var. Müsavatdan getmişəm, dostluqdan getməmişəm”, – N.Cəfəroğlu bildirib. Musavat.com-un məlumatına görə, Novella Cəfəroğlu ilə Müsavat Partiyasının rəhbərliyi arasında 1 sentyabr parlament seçkilərinə münasibətdə fikir ayrılığı yaranıb. Belə ki, N.Cəfəroğlunun rəhbərlik etdiyi “Mənim səsim” seçki Monitorinq Koalisiyasının seçki günü ilə bağlı hazırlayıb yaydığı hesabatda seçkilərin heç bir problem yaşanmadan, qanunauyğun və düzgün keçirildiyinin bildirilməsi Müsavat Partiyasının rəhbərliyini narazı salıb. Onlar bu hesabatdakı fikirlərlə Müsavat Partiyasının seçkilərlə bağlı mövqeyinin bir-birinə zidd olduğunu, hesabatın reallığı əks etdirmədiyini əsas göstərək Novella Cəfəroğlundan izahat tələb ediblər.

Bu günə kimi İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyi tərəfindən (KOBİA) KOB-ların “yaşıl layihə”lərinin inkişaf etdirilməsinə və “yaşıl iqtisadiyyat”a keçidə töhfə verə biləcək 19 layihəyə qrant ayrılıb, 10-a yaxın “Startap” şəhadətnaməsi verilib. Bu barədə KOBİA məlumat yayıb. Bildirilib ki, “Yaşıl biznes”lər dayanıqlı istehsala nail olunmasında, resurs və enerji səmərəliliyinin artırılmasında əhəmiyyətli rol oynayır. Məlumata əsasən, sahibkarların “yaşıl layihə”ləri müxtəlif dövlət dəstəyi mexanizmləri vasitəsilə, o cümlədən KOBİA tərəfindən dəstəklənir. Belə ki, “Yaşıl layihə”ləri olan sahibkarlıq subyektləri qrant, “Startap” şəhadətnaməsi, daxili bazar araşdırmasının aparılması, təlim, sərgilərə çıxış kimi dəstək alətləri üçün KOBİA-ya müraciət edə bilərlər. KOB subyektlərinin bərpa olunan enerji qaynaqlarından elektrik enerjisi istehsal edə bilən şarj stansiyasının və şarj cihazının istehsalı, bunun üçün lazım olan proqram təminatının hazırlanması, aşağı temperaturlu geotermal suların istiliyindən səmərəli yolla elektrik və istilik enerjisinin alınması, smart polimer kompozisiya materiallarından istifadə etməklə binalarda enerji sərfiyyatının azaldılması, “ağıllı suvarma” texnologiyasının yaradılması və onun praktiki fəaliyyətinin araşdırılması, ekoloji R2 (Responsible Recycling) sertifikatının alınmasına dəstək, atmosferdən suyun əldə edilməsi üçün innovativ su generatorunun istehsalı və satışı, tullantıların ağıllı yolla toplanması və emalı, yeni tipli külək enerjisi turbinlərinin hazırlanması və s. layihələrə Agentlik tərəfindən 338 min manatdan çox qrant ayrılıb. Alternativ içməli su mənbəyinin yaradılması, üzvü tullantıları emal edərək yem istehsalında istifadə oluna biləcək protein, yağ və yüksək verimli gübrənin istehsalı, kənd təsərrüfatında suvarma səmərəliliyinin artırılması üçün ağıllı su depolayıcı materialın hazırlanması və s. layihələr üçün KOB subyektlərinə vergi güzəştini nəzərdə tutan “Startap” şəhadətnamələri verilib. Təkrar emal və tibbi tullantıların zərərsizləşdirilməsinə dair sahibkarların müraciəti əsasında daxili bazar araşdırmaları aparılıb. Eyni zamanda KOBİA tərəfindən sahibkarlara “yaşıl iqtisadiyyat” ilə bağlı təlim və məsləhət xidmətləri göstərilib. Təkcə 2024-cü ildə Agentlik Bakı şəhərində, Lənkəran, Şəki və Xaçmaz rayonlarında 140-a yaxın KOB subyektinin iştirakı ilə “Yaşıl iqtisadiyyat və yaşıl biznes”, “Yaşıl maliyyələşmə”, “Yaşıl innovasiyaların inkişafında mövcud imkanlar, çətinlik və perspektivlər” mövzularında təlim, seminar və maarifləndirmə tədbirləri təşkil edib. Sahibkarların yaşıl layihələrinin Agentliyin təşkilatçılığı və dəstəyi ilə keçirilən müxtəlif sərgi və yarmarkalara çıxarılmasına da dəstək göstərilib. Biznes subyektlərinin ətraf mühitə təsirini ölçmək, istifadə etdikləri resurslardan istifadənin səmərəliliyini qiymətləndirmək məqsədilə Agentlik tərəfindən sahibkarlar üçün özünüqiymətləndirmə platforması (https://yb.smb.gov.az/) yaradılıb. Biznes subyektləri bu platformada qeydiyyatdan keçərək müvafiq sualları cavablandırmaqla enerji və sudan nə dərəcədə səmərəli istifadə etdiklərini, tullantıların effektiv idarə olunması və ətraf mühitə təsirlərini qiymətləndirərək zəif nöqtələrini müəyyən edə və onların aradan qaldırılması üçün zəruri tədbirlər görə bilərlər.

Qarabağ və Şərqi Zəngəzurda həyata keçirilən Böyük Qayıdış proqramı, işğaldan azad olunmuş ərazilərə məcburi köçkünlərin geri dönməsi və onların təhlükəsiz məskunlaşması istiqamətində atılan mühüm addımlardan biridir. Bu prosesin uğurla başa çatması, yalnız regionun bərpası və inkişafı baxımından deyil, həm də xalqımızın gələcək nəsilləri üçün tarixi bir hadisə kimi dəyərləndirilir. Bu baxımdan, Qərbi Azərbaycana da böyük qayıdışın baş verəcəyi və məcburi köçkünlərin öz yurdlarına təhlükəsiz və ləyaqətli şəkildə qayıdacağına dair böyük ümidlər var. “Bakı Qeyri- Hökumət Təşkilatlarının Resurs və Təlim Mərkəzi” İctimai Birliyinin sədri Rauf Zeyni QHT.az-a açıqlamasında bildirib ki, Böyük Qayıdış proqramının uğurla həyata keçirilməsi, gələcəkdə Qərbi Azərbaycana da məcburi köçkünlərin təhlükəsiz və ləyaqətli formada qayıdışına təkan verəcək. Rauf Zeyni bu prosesi xalqımızın tarixi bir şahidlik olaraq yaşayacağına ümid etdiyini vurğulayıb. Qarabağ və Şərqi Zəngəzurda məskunlaşma və işlə təminat uğurla reallaşdıqca, Qərbi Azərbaycana da Böyük Qayıdışın gerçəkləşməsi istiqamətində ciddi addımlar atılacaq: “Böyük qayıdış uğurla həyata keçirilir və tabii ki, Qarabağ adlı Şərqi Zəngəzura böyük qayıdış həm də gələcəkdə Qərbi Azərbaycana böyük qayıdışın gerçəkləşməsinə çox böyük təkan olur. İnşallah, Allah qısmət eləsin bizim soydaşlarımız, yurddaşlarımız Qərbi Azərbaycan da böyük qayıdışı təhlükəsiz və ləyaqətli şəkildə həyata keçirə bilsin. İnanıram ki, bizim xalqımız bu tarixi şahidi olacaq”.