Bakı QHT Resurs və Təlim Mərkəzi

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və Bakı QHT Resurs və Təlim Mərkəzinin təşkilatçılığı ilə həyata keçirilən “Bakı, Sumqayıt şəhərləri və Abşeron rayonunda fəaliyyət göstərən qeyri-hökumət təşkilatlarına 2022-ci il üzrə təşkilati-texniki xidmətlərin göstərilməsi” layihəsi çərçivəsində 29 aprel 2022-ci il tarixində Sumqayıt şəhəri Heydər Əliyev Mərkəzində tədbir keçirildi. Bakı QHT Resurs və Təlim Mərkəzinin sədri Rauf Zeyni çıxış edərək tədbiri açıq elan etdi. Öz çıxışında layihənin əsas məqsədi haqqında məlumat verdi. Layihənin məqsədi Bakı QHT Resurs və Təlim Mərkəzinin üzvü olan QHT rəhbərlərinin və personalının professional idarə etmə qabiliyyətlərinin artırılması üçün institusional (informativ, metodiki təşkilatı və digər) dəstəyin təşkil olunması bununla ölkədə vətandaş cəmiyyəti institutlarının inkişafına nail olmaqdan ibarətdir. Daha sonra, Sumqayıt şəhəri İcra Hakimiyyətinin nümayəndəsi Fərman Kazımov öz çıxışında Sumqayıt şəhərində fəaliyyət göstərən QHT-lər haqqında məlumat verdi. Daha sonra, tədbir iştirakçılarına söz verildi. Mədəni İnkişafın Təbliği İctimai Birliyinin sədri Xatirə Fərəcova vətəndaş cəmiyyətinin inkişafında Bakı QHT Təlim və Resurs Mərkəzinin əhəmiyyətli rol oynadığını bildirərək mərkəzin sədri Rauf Zeyniyə öz minnətdarlığını bildirdi. Daha sonra, Azərbaycan Milli QHT Forumu Könüllüləri İctimai Birliyinin sədri Nərmin Kərimova çıxış edərək, Qeyri-Hökumət Təşkilatlarında könüllülük hərəkatının geniş vüsət alması bar ədə çıxış etdi. Eyni zamanda iştirak edən digər QHT nümayəndələrini çevik könüllüllük hərəkatının daha da genişləndirilməsində birgə əməkdaşlığa dəvət etdi. Azərbaycan Vətən Müharibəsi Veteranları İctimai Birliyi Sumqayıt şəhər şöbəsinin sədri Teymuraz Mansurov da çıxış edərək, Qeyri-Hökumət Təşkilatlarının ölkəmizin təbliğində daha çox işlər görülməsini diqqətə çatdırıb. Qeyd edək ki, Bakı QHT Resurs və Təlim Mərkəzi Bakı və Sumqayıt şəhərləri, eləcə də Abşeron rayonunda fəaliyyət göstərən QHT-lərin tədbir və layihələrini yüksək səviyyədə təşkil olunması üçün hər bir texniki avadanlıqla təchiz olunub. Layihə çərçivəsində Bakı və Sumqayıt şəhərləri, eləcə də Abşeron rayonunda fəaliyyət göstərən QHT-lər üçün hüquqi, eyni zamanda davamlı tərzdə artması və inkişafı üçün əlverişli mühit yaradılacaqdır. Buna əsasən, layihə çərçivəsində ictimai, dövlət və özəl sektorda milli QHT-lərin işinin və potensial rolunun artmasına yardım göstərilməsi, vətəndaş cəmiyyəti quruculuğunda milli hökumət və hər hansı beynəlxalq təşkilata informasiya və digər cəhətdən yardım göstərilməsi, hökumət, milli və beynəlxalq donorlar, texniki müəssisələr, mətbuat və xüsusi agentliklərlə əlaqələrinə kömək göstərilməsi nəzərdə tutulur.

Azərbaycan Respublikasının Prezidenti Zati-aliləri cənab İlham Əliyevə Möhtərəm Prezident! Sizi, doğum gününüz münasibətilə səmimi qəlbdən təbrik edir, Sizə möhkəm can sağlığı, Azərbaycanımızın daha da çiçəklənməsi və inkişafı yolunda  fəaliyyətinizdə uğurlar arzulayırıq! Bu gün Azərbaycan tarixinə parlaq, qürurverici, şanlı, tarixi zəfərlərimiz yazılır. Sizin Ali Baş Komandanı olduğunuz Azərbaycan Ordusu 30 il ərzində Ermənistan silahlı birləşmələrinin işğalı altında qalan torpaqlarımızı addım-addım işğaldan azad etmişdir. Sizin yerinə yetirdiyiniz siyasəti dəstəkəyərək ətrafınızda yumruq kimi birləşərək apardığımız müqəddəs Vətən müharibəsi Azərbaycan xalqını 30 illik arzu və istəklərinə qovuşdurmuşdur. Sentyabrın 27-dən etibarən Ermənistanın Azərbaycana qarşı törətdiyi növbəti hərbi təxribata cavab olaraq Sizin göstərişinizlə müzəffər Azərbaycan Silahlı Qüvvələrinin bütün cəbhəboyu başlatdığı əks-hücum əməliyyatları nəticəsində 5 rayonumuzun şəhər və qəsəbələri, yüzlərlə kəndi, strateji əhəmiyyət daşıyan yüksəkliklər düşməndən təmizlənmiş, həmin ərazilərimizdə üçrəngli bayrağımız əbədi olaraq dalğalandırılmışdır. Digər ərazilərimiz isə Azərbaycan, Rusiya və Ermənistan tərəfindən imzalanan bəyanat ilə geri qaytarılmış, bununla da  mənfur düşmənin məğlubiyyəti bərqərar olmuşdur. Müzəffər Azərbaycan Ordusunun Ali Baş Komandanı, qüdrətli və yenilməz sərkərdəmiz – Sizin rəhbərliyinizlə cəsur zabit və əsgərlərimiz dünya güclərinin uzun illər göz yumduğu tarixi ədaləti bərpa etmişdir. Ölkəmizin ərazi bütövlüyünün bərpası, əzəli torpaqlarımızın erməni işğalından azad olunması uğrunda canından-qanından keçən şəhidlərimizin qisasının yerdə qalmadı. Dəfələrlə Siz xalqa etdiyiniz öz müraciətlərinizdə xalqımıza dövlətimizin, Azərbaycan Ordusunun haqq yolunda olduğunu, böyük qələbənin hər gün, hər an yaxınlaşdığını qətiyyətlə və inamla bəyan etmişdiniz. Müharibənin ilk günündən sentyabrın 27-də xalqa müraciətinizdə bir daha qətiyyətlə bildirmişdiniz: “Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!” Azərbaycan xalqı Sizin apardığınız siyasəti hər zaman dəstəkləyir və bu böyük qələbəyə hər bir vətəndaş inanmışdır. Möhtərəm Prezident! 2006-ci ildə Sizi doğum gününüz münasibətilə təbrik etdiyim məktubda qeyd etmişdim ki, Siz Azərbaycan xalqının yaddaşında Qurucu İlham kimi qalacaqsınız. 44 günlük Vətən müharibəsində Sizin rəhbərliyiniz və müzəffər Azərbaycan Ordusunun keçirdiyi hərbi əməliyyatlar nəticəsində qazanılan zəfər son iki əsrdə tarixdə görülməmişdir. Buna görə də Siz artıq Qarabağ Fatehi kimi yaddaşlara həkk olunacaqsınız. Sizi Azərbaycan Milli QHT Forumu adından və şəxsən öz adımdan torpaqlarımızın işğaldan azad olunması münasibətilə təbrik edir, Sizinlə qürur duyduğumuzu bildiririk. Azərbaycan xalqına yaşatdığınız bu tarixi azadlıq üçün vətəndaş cəmiyyəti kimi öz təşəkkürümüzü bildiririk və Sizə böyük uğurlar diləyirik. Dərin hörmət və ehtiramla, Rauf Zeyni MQF-nin prezidenti

MQF “Ailə Dəstək ” Mərkəzinin  26 dekabr  2017-ci il tarixində keçirilən “Təhsil – cəmiyyətin və ailənin əsas meyarıdır” mövzusunda tədbirin icrasına başlanmışdır. Tədbirin əsas məqsədi. Vətəndaş cəmiyyətində insanlar müxtəlif sosial qruplar yaratmaq imkanına sahib olur. İnsanların təsis etdiyi sosial qruplardan ən önəmlisi ailədir. Ailə kiçik sosial qrup olub cəmiyyətin ilkin özəyini təşkil edərək, onu formalaşdıran əsas elementlərdən biri sayılır. Cəmiyətin inkişafında ailənin rolu böyükdür. Nikah isə ailənin hüquqi əsasıdır. Ölkənin inkişafı haqqında fikir söyləmək üçün cəmiyyətdə ailənin vəziyyətinə və dövlətin ailəyə münasibətinə nəzər salmaq lazımdır. Ailənin əmin-amanlığı ölkənin tərəqqi və inkişaf meyarıdır. MQF “Ailə Dəstək ” Mərkəzi bacardığı qədər maariflənmə işi apararaq hesab edir ki, ailə şəxsiyyəti və cəmiyyəti formalaşdıran mühüm sosial institutdur. Cəmiyyətin formalaşmasında mühüm rol oynayan şəxsiyyətin əxlaqi və sosial keyfiyyətlərinin əsası ailədə qoyulur. Bu mənada ailə cəmiyyətin insani dəyərlərinin qorunmasını, nəsillərin mədəni və tarixi varisliyini təmin edən əsas meyardır. Mərkəz çalışır ki, ictimai sahədəki fəaliyyətini vətəndaşlara və institutlara daha inkluziv dünyaya töhfə verməkdə kömək etsin və sosial tədbirlərdən tutmuş müxtəliflik və gənclərlə bağlı məsələlərə kimi bütün lokal məsələləri qlobal miqyasa çatdırsın. Gənclər fəal vətəndaşlıq sahələrində fəaliyyət göstərən yerli və beynəlxalq təşkilatlarla əməkdaşlıq səviyyəsində proqramlar həyata keçirsin. Gənc nəslin tərbiyəsi yaşadığı mühitlə, ünsiyyətdə olduğu insanlarla, təlim-tərbiyə aldığı pedaqoji kollektiv, ən vacibi isə böyüyüb başa çatdığı ailəsi ilə sıx bağlıdır. Təlim-tərbiyə isə insan psixologiyasını formalaşdıran mühüm amil sırasında öndə gedən elementdir, çünki uşaqların fərqli olan baxışları, qavrayışı, nitqi məhz ailədə, məktəbdə və cəmiyyətdə təşkil olunan tərbiyə əsasənda formalaşır. Ona görə də tərbiyə, xüsusilə də məktəblərdə qurulan tərbiyə işi hər bir müəllimdən pedaqoji ustalıq tələb edir. Pedaqoqlar uşaq psixologiyasını onların baxışlarından oxumalı, ailə həyatları, məişətləri ilə yaxından tanış olmalıdırlar. Məhz buna görə müasir dövrün tələbləri müəllimlərin üzərinə ciddi vəzifələr qoyur. Ümumiyyətlə, gənc nəsil ailə və məktəbdə formalaşır, mühitdə inkişaf edir. Qazandığı uğurları iş prosesində – peşədə, sənətdə davam etdirərək xalqa, doğmalarına fayda verir. İctimai mühitin də, kollektivin də, rəhbərliyin də, dostların da gənclərin tərbiyəsində rolu hədsizdir. Bunun üçün cəmiyyətdə demokratiyanın inkişaf etdirilməsi əsas şərtdir ki, bu da gəncliyin sağlam inkişafına təkan verir. Azərbaycanda ailə dövlətin himayəsindədir. Analıq, atalıq, uşaqlıq qanunla mühafizə edilir. Ailə qanunvericiliyi ailənin möhkəmləndirilməsi zəruriyyətindən, ailə münasibətlərinin qarşılıqlı məhəbbət və hörmət hissləri əsasında qurulmasından, ailənin işinə hər kəsin qarışmasının yolverilməzliyindən, ailə üzvlərinin ailə qarşısında qarşılıqlı yardım və məsuliyyətindən, onların hüquqlarının maneəsiz həyata keçirilməsinin təmin olunmasından və bu hüquqların məhkəmədə müdafiəsi imkanlarından irəli gəlir.

Bakı QHT Resurs və Təlim mərkəzində 06 iyun 2017-ci il MQF Psixoloji Araşdırma və Dəstək Mərkəzinin illik hesabatı və növbəti fəaliyyət proqramının təqdimatı keçirilmişdir. Tədbiri giriş sözü ilə açan Azərbaycan Milli QHT Forumunun (MQF) prezidenti Rauf Zeyni Forumun tərkibində ilk yaradılan mərkəzlər biri olan MQF Psixoloji Araşdırma və Dəstək Mərkəzinin gördüyü işlərdən və nəaliyyətlərindən danışdı və Mərkəzin MQF-nin fəaliyyətində vacib rolunu qeyd etdi. Sonra Mərkəzin rəhbəri Vüsalə Xəlilova Mərkəzin yaradılan zamandan bu günə kimi gördüyü işlər barədə təqdimat edərək, gələcək fəaliyyət proqramı haqqında ətraflı məlumat verdi. Gələcəkdə Mərkəzin nəzdində “Qaynar Xətt”in olmasını vurqulayaraq, onun Foruma verəcək faydalarını qeyd etdi. Tədbirdə iştirak edən digər Mərkəz rəhbərləri çıxış edərək birlikdə tədbirlərin keçirilməsi, əlaqələrin güclənməsi haqqında öz fikirlərini bildirdi və müzakirələr edildi.

“İranlı Mühacirlər Cəmiyyəti” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyələşdirdiyi “Mühacir problemi ilə bağlı Azərbaycan modelinin öyrənilməsi mövzusunda maarifləndirici tədirlərin keçirilməsi” layihəsinə noyabrın 18-də yekun vurub. Layihə çərçivəsində reallaşdırılan “İranlı Mühacirlər Cəmiyyəti – mühacirətin dünyəvi Azərbaycan modeli” adlı dördüncü “dəyirmi masa” İMC-in üzvü olduğu Milli Qeyri-Hökumət Təşkilatları Forumunun zalında düzənlənib. İştirakçılar bir gün öncə Fəxri Xiyabana baş çəkmiş, iranlı mühacirlərə müstəsna qayğı nümunələri ilə xatirələrdə qalan Ümummilli Liderimiz Heydər Əliyevin, Azərbaycan Demokrat Firqəsinin banısı və Təbrizdəki Milli Hökumətin baş naziri Seyid Cəfər Pişəvərinin, həmçinin təşkilatın rəhbərləri olmuş general Qulam Yəhyanın abidələri, Əmirəli Lahrudinin məzarı önünə tər çiçək dəstələri düzmüşlər. Tədbiri giriş sözü ilə açan “İranlı Mühacirlər Cəmiyyəti” İctimai Birliyinin sədri, əməkdar jurnalist Rəhim Hüseynzadə iştirakçıları əvvəl sənədli filmə baxmağa dəvət edib: “Bu, 70 ilin xronologiyasıdır. Orada ata-babalarımızı, onların yolunu layiqincə davam etdirənləri, digər kadrları görərkən bir daha İranlı Mühacirlər Cəmiyyətinin  mühacirətin dünyəvi Azərbaycan modeli sayılmasına məntiqi əsasların olduğu qənaətinə gələcəyiniz şəksizdir”. Filmin nümayişindən sonra layihənin ekspertləri – İMC sədrinin birinci müavini, ehtiyatda olan polkovnik Firudin İbrahimi və “İnsan Hüquqlarının Müdafiəsi və Ekologiyanın Qorunması Mərkəzi”nin sədri Zeynalabdin Abbasov bildiriblər ki, əslində onların sadalayacaqları aspektlər sənədli filmdə təfərrüatı ilə lentə alınıb. Ekspertlər vurğulayıblar ki, 1946-cı ilin dekabrında Arazın bu tayına pənah gətirən insanların hər biri milliyətindən asılı olmayaraq doğmalar kimi qayğı ilə əhatə edildi. İşlə, yatacaqla təmin olunan bu insanların cəmi 10 il sonra hamısının öz mənzili, evi var idi. 70 faizi yazıb-oxumağı bacarmayan həmin şəxslərin sırasından 33 il ərzində 200 nəfər elmlər namizədi, doktoru yetişdi. Onlar istehsalatda, quruculuq işlərində, elmdə, mədəniyyətdə, incəsənətdə, idmanda misilsiz uğurlar qazandılar. İMC İdarə Heyəti üzvü, Azərbaycan Dövlət Tibb Universitetinin müəllimi, tibb elmləri namizədi Adilə Çernikbülənd; “70 il əvvəl müharibədən çıxan ölkəyə mühacirət etdik. Çətinliklərə baxmayaraq heç nəyi əsirgəmədilər. Potensialımız filmdən göründüyü kimi göz önündədir. Haqq itirən olmadığımızdan sağ ol demək borcumuzdur. Bu ölkənin də bizim timsalımızda sarsılmaz, möhkəm dayaqları var. Sadəcə bütün bunların təbliğatı aparılmalı, maarifçilik işi genişləndirilməlidir”. Səməd Bayramzadə (AMEA-nın Şərqşünaslıq İnstitutunun” şöbə müdiri, tarix üzrə fəlsəfə doktoru): “İstər müzakirəyə çıxarılan mövzu, istərsə də təqdim olunan sənədli film müasirdir, günümüzlə səsləşəndir. Mühacirətlə bağlı tendensiyalara, xüsusilə mühacirət tarixinə kompleks yanaşılmasını dövrümüz diqtə edir. Məsələ indiyədək təhqiqat obyekti olmadığından istərdik alim və mütəxəssislərimiz bu istiqamətə də üz tutsunlar”. İMC-nin Zaqatala regional təşkilatının sədri Rəsul Rzayi 10 min nəfərdən çox mühacirin orden, medal, döş nişanları ilə təltif edildiyini nəzərə çatdıraraq deyib: “Filmdə simalarını gördüyünüz 3 nəfər Sosialist Əməyi Qəhrəmanı, bir sıra istehsalat qabaqcılları təkcə bizim yaşadığımız Şəhriyar qəsəbəsinin deyil, bütün respublikanın fəxridirlər”. İranlı Mühacirlər Cəmiyyəti Ədəbi Birliyinin sədri, Dədə Qorqud beynəlxalq mükafatı laureatı, şair Tariyel Ümidin “Mühacirət” şeiri, eləcə də Sədaqət Cahaninin (Gəncə şəhəri) poetik misraları ədəbi ənənələrin davamından xəbər verirdi. “20 Yanvar” Cəmiyyətinin sədr müavini Mustafa Əliyev iranlı mühacirlər barədə yeni bilgilərdən məmnun qaldığını dilə gətirdi: “Bizim Şəhidlər Xiyabanında ziyarət etdiyimiz qəhrəmanlar sırasında iranlı mühacirlər və onların övladları da var. Hər biri iftixarımızdır, ruhları qarşısında baş əyirik”. Ötən əsrin 80-ci illərində Azərbaycana mühacirət edənlərdən İMC-in sədr müavinləri Həsən Babayi, Murtuza Nizamoğlu, həmçinin İbrahim Şiri onlarla birgə Azərbaycana müxtəlif millətlərin nümayəndələrinin gəldiklərni, hər birinin qısa vaxtda təhsillə, işlə təmin olunduqlarını deyərkən həmin vaxtlarda digər ölkələrə gedən yoldaşları ilə müqayisələr apardılar: “Onların ağır şəraitləri barədə narazılıqlarını eşitmək hər halda üzücü idi”. Bakı Dövlət Universitetinin professoru, pedaqoji  elmləri doktoru Mehman Məmmədov çıxışında layihənin davamının vacibliyini nəzər çatdıraraq bu icma ilə bağlı ölkədə məlumat dairəsinin genişlənməsini zəruri saydı. BDU-nun professoru Pərviz Kazimi: “İstər ata-babalarımızın vaxtında, istərsə də indinin özündə müxtəlif ölkələrə mühacirətlər olub. Lakin onların heç biri İranlı Mühacirlər Cəmiyyəti kimi modelləşə bilməyib. Pərakəndəlik fəaliyyətlərinə xasdır”. Tədbirdə sənətkarlardan əməkdar artist Ruhəngiz Musəvinin, Həsən Cəbrayılovun, Tahirə Muradovanın çıxışlarında mühacirlərin Azərbaycanın mədəniyyət və incəsənətinin inkişafına verdikləri töhfələrdən danışıldı. Xətai rayon icra hakimiyyətinin memarı Qaçay Əzizi və həkim Mənijə İbrahimi –Kazımovskaya isə təhsil fonundakı qayğı nümunələrini vaxtilə oxuduqları İvanova beynəlmiləl internat məktəbindəki yaşantıları ilə əsaslandırdılar. Çıxışlarda birmənalı surətdə vurğulandı ki, iranlı mühacirlər onlara Ulu Öndər Heydər Əliyev dönəmindəki göstərilən diqqət və qayğı ənənəsinin Azərbaycan Respublikasının Prezidenti Cənab İlham Əliyev tərəfindən davamından məmnundurlar və belə münasibətə görə respublikanın daha da çiçəklənməsi naminə hər cür fədəkarlıq nümunəsi göstərməkdə davam edirlər.