Bakı QHT Resurs və Təlim Mərkəzində Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə XXI Əsr Təhsil Mərkəzi İctimai Birliyinin sədri Etibar Əliyevin müəllifi olduğu “Tam orta təhsil pilləsində dərs deyən müəllimlərin peşəkar kompetensiyalarının artırılmasına dəstək” layihəsi çərçivəsində hazırladığı “Müəllimlərin peşəkar kompetensiyalarının artırılmasına dəstək, mövcud təcrübələr, tövsiyələr”  adlı kitabının təqdimat mərasimi keçirilib.
XXI Əsr Təhsil Mərkəzi İctimai Birliyinin sədri, kitabın müəllifi  Etibar Əliyev tədbiri giriş sözü ilə açaraq tədbir iştirakçılarını salamlayıb və daha sonra tədbir iştirakçılarına kitab haqqında geniş məlumat verib.
O bildirib ki, Azərbaycan Respublikası Prezidentinin 2013-cü il 24 oktyabr tarixli Sərəncamı ilə təsdiq edilmiş Azərbaycan Respublikasında təhsilin inkişafı üzrə Dövlət Strategiyasının 2-ci strateji istiqaməti təhsil sahəsində insan resurslarının müasirləşdirilməsini nəzərdə tutur. Bu istiqamət innovativ təlim metodlarını tətbiq edən, təhsilin məzmununun səmərəli mənimsənilməsini təmin edən səriştəli təhsilverənin formalaşdırılmasına xidmət edir və özündə təhsilverənlərin peşəkarlığının yüksəldilməsi, təhsilalanların nailiyyətlərinin qiymətləndirilməsi üzrə yeni sistemlərin qurulmasını, təhsilalanların istedadının aşkar olunması və inkişafı ilə bağlı, habelə xüsusi qayğıya ehtiyacı olanlar üçün inklüziv təlim metodologiyasının yaradılmasını ehtiva edir.
“Tam orta təhsil pilləsində dərs deyən müəllimlərin peşəkar kompetensiyalarının artırılmasına dəstək” layihəsi çərçivəsində hazırlanmış kitab məhz strategiyada nəzərdə tutulan səriştəli təhsilverənin formalaşdırılmasına xidmət edir.Kitab giriş də daxil olmaqla 17 paraqrafdan ibarətdir. Kitabda müəllimlərin peşəkar kompetensiyalarının artırılmasına dəstək məqsədilə dünya təcrübəsindən nümunələr verilmiş, bu istiqamətdə maraqlı ədəbiyyatlardan tərcümələr seçilmişdir.Kitabda həmçinin İnformasiya Kommunikasiya Texnologiyalarının və yeni təlim metodlarının peşəkar kompetensiyaların inkişafındakı rolu geniş işıqlandırılmışdır. Kitab orta məktəb müəllimləri, müəllim hazırlığı həyata keçirən ali məktəb müəllimləri, təhsil problemləri ilə məşğul olan mütəxəssislər üçün nəzərdə tutulub.
Tədbirdə çıxış edən Milli QHT Forumunun (MQF) prezidenti Rauf Zeyni, Milli QHT Forumunun (MQF) İdarə Heyətinin sədr müavini, Vətəndaşların Sosial Rifahı Naminə İctimai Birliyinin sədri İradə Rizazadə, MQF Elm Mərkəzin rəhbəri Nüşabə Məmmədova, Milli Məclisin deputatı Fazil Mustafa, Təhsil Naziriliyi İnformasiya şöbəsinin müdir müavini Cəsarət Valehov, Bakı Sənayə-Pedaqoji Kollecinin pedaqoqu Rəsul Əliyev, Təhsil Şurasının sədri Əjdər Ağayev və digərləri öz çıxışlarında  bu kimi elmi nəşrlərin vacib olduğunu vurğulayıblar.
Sonda bir daha belə bir kitabın ərsəyə gəlməsinə görə müəllifə öz minnətdarlıqlarını bildiriblər.